भक्तपुर, १४ असार । वागीश्वरी कलेज कमलविनायकमा सामाजिक कार्य विषय लिई अध्ययनरत स्नातक तह दोस्रो वर्ष (२०७७ वाय्च) का विद्यार्थीहरूले कलेजका क्यान्सर पीडित एक विद्यार्थीलाई आर्थिक सहयोग गरेका छन् । आफ्नै कक्षाका साथी लिभर र प्यानक्रियाजमा क्यान्सर भई उपचारको लागि काठमाडौं क्यान्सर केयर सेन्टर फैढोकामा भर्ना भइरहेको थाहा भएपछि सामाजिक कार्यका विद्यार्थीहरू आर्थिक सहयोगका लागि तत्पर भएका हुन् ।
सहयोगी विद्यार्थीहरूले कलेजमा अध्ययनरत विद्यार्थीहरू र अध्यापनरत शिक्षकहरूसँग आर्थिक सहयोग सङ्कलन गरी प्राचार्य धनकुमार श्रेष्ठसहितको टोली क्यान्सर केयर सेन्टरमा पुगी रकम हस्तान्तरण गरिएको हो ।
सहयोग रकम ग्रहण गर्दै पीडित विद्यार्थीले सहयोगी सबैप्रति आभार प्रकट गरे भने टोलीले स्वास्थ्य लाभको कामना गरेको थियो । सहयोग रकम सङ्कलन गर्न काजल थापा, नम्रता रञ्जितकार र मालती पराजुलीलगायतका विद्यार्थीहरू सक्रिय भएका थिए ।