Month: July 2023

भक्तपुर– वागीश्वरी कलेज स्नातक तहमा अध्ययनरत विद्यार्थीहरुले गुरुपूर्णिमाको अवसरमा शिक्षकशिक्षिकाहरुलाई शुभकामना कार्यक्रम आयोजना गरेको छ ।
कार्यक्रममा वागीश्वरी कलेजका संयोजक ज्ञानसागर प्रजापतिले गुरुहरु तबमात्र खुसी हुन्छ जब नेपाल आमा खुसी हुन्छिन्, विद्यार्थीहरु पलायन नभई स्वदेशमै आफ्नो पसिना बगाई नेपालको विकासमा योगदान गर्न आग्रह गर्नुभयो ।
कलेजका प्राचार्य धनकुमार श्रेष्ठले कार्यक्रमका लागि सम्पूर्ण विद्यार्थीहरुलाई धन्यवाद व्यक्त गर्नुभयो ।
उक्त कार्यक्रममा विद्यार्थीहरु सरिना वाडेले गुरुपूर्णिमा र रामहरि चोलागाईले व्यासको बारेमा मन्तव्य व्यक्त गरेका थिए ।

भक्तपुर– वागीश्वरी कलेजको आयोजनामा विश्वविद्यालय अनुदान आयोगको सहयोगमा उद्यमशीलता सहयोग कार्यक्रमअन्तर्गत ‘आइडिया पिचिङ्ग’ असार १४ गते बिहीबार सम्पन्न भएको छ ।

कार्यक्रममा अतिथि विश्वविद्यालय अनुदान आयोग अनुसन्धान विभागका सहायक निर्देशक दिनेश प्रजापतिले उद्यमशील व्यवसायी सुरु गर्न नेपालमा भइरहेको आर्थिक तथा व्यवहारिक गतिविधिलाई अध्ययन गर्नुपर्ने आवश्यकता औंल्याउनुभयो ।
नेपाल घरेलु तथा साना उद्योग महासङ्घका वरिष्ठ उपाध्यक्ष सत्यनारायण प्रजापतिले जसले जोखिम उठाउँछ उही उद्योगपति बन्छ भन्ने भाव व्यक्त गर्नुभयो । साथै सहभागी विद्यार्थीहरू तथा शिक्षकशिक्षिकाले प्रस्तुत गरेको योजनाहरू लघु उद्योग र घरेलु उद्योगमा राम्रो सम्भावना भएको र विद्यार्थीहरूले उद्यामशीलतासम्बन्धी थप अध्ययन गर्नु राम्रो पक्ष भएको बताउनुभयो ।
२०७९ चैत्र २१ गतेदेखि वागीश्वरी कलेजले सञ्चालन गरेको ४० घण्टे उद्यमशीलता सहयोग कार्यक्रमअन्तर्गत सञ्चालित तालिममा सहभागी विद्यार्थी तथा शिक्षकशिक्षिकालाई विभिन्न स्रोतव्यक्तिमार्फत उद्यमशीलतासम्बन्धी प्रशिक्षण दिँदै आएको थियो ।
जम्मा ३० जना सहभागी रहेको तालिममा १३ जना सहभागीले आ–आफ्नो आइडिया पिचिङ्ग गरेका थिए ।

विद्यार्थीहरूलाई स्वरोजगार तथा उद्यमशीलतातर्फ प्रोत्साहन गर्ने लक्ष्यका साथ विश्वविद्यालय अनुदान आयोगले उक्त कार्यक्रमको लागि सार्वजनिक प्रस्ताव आह्वान गरेकोमा वागीश्वरी कलेज समेत गरी १८ वटा कलेजहरू मात्र छनोट भएको थियो ।
विश्वविद्यालय अनुदान आयोगले उद्यमशील सहयोग कार्यक्रम मातहतमा सानो उद्यमीलाई ५ लाख रूपैयाँ, मझौला उद्यमीलाई २० लाख तथा ठूलो उद्यमीलाई ४० लाख रूपैयाँसम्मको बीउँ पूँजी प्रदान गरिने घोषणा गरेको थियो ।
साथै ‘आइडा पिचिङ्ग’ कार्यक्रममा सहभागीहरूको योजना छनोटका लागि निर्णायकहरूमा नेपाल घरेलु तथा साना उद्योग महासङ्घका वरिष्ठ उपाध्यक्ष सत्यनारायण प्रजापति, भक्तपुर उद्योग वाणिज्य सङ्घका उपाध्यक्ष कृष्णमुरारी न्यौपाने, भक्तपुर नगरपालिकाका प्रतिनिधि रामसुन्दर सुजखु, स्रोतव्यक्ति जस्मिन कर्माचार्य तथा वागीश्वरी कलेजका उपप्राध्यापक नविन प्रजापति रहनुभएको थियो ।
कार्यक्रममा प्राचार्य धनकुमार श्रेष्ठले निर्णायकहरूलाई मायाको चिनो प्रदान गरिएको थियो भने वागीश्वरी कलेजका शिक्षक मंगलेश्वर ध्वजुले पनि बोल्नुभएको थियो ।