Category: Uncategorized

भक्तपुर । वागीश्वरी कलेज, तुमचो कमलविनायकको एघारौं कलेज सभा एक विशेष कार्यक्रमका साथ मङ्सिर १६ गते शनिबार सम्पन्न भएको छ । कलेज व्यवस्थापन समितिका अध्यक्ष एवं भक्तपुर नगरपालिकाका प्रमुख सुनिल प्रजापतिको सभापतित्वमा भएको उक्त सभामा उहाँले कलेजको विधानअनुसार कलेजको सबभन्दा माथिल्लो निकाय कलेजसभा भएको उल्लेख गर्दै सभा सफल पार्न योगदान गर्ने सबैलाई धन्यवाद ज्ञापन गर्नुभयो ।
देशको शैक्षिक अवस्था गिर्दै धेरै कलेजहरु बन्दको अवस्था भए पनि वागीश्वरी कलेजमा अझै १२०६ जना विद्यार्थी अध्ययनत रहेको प्रतिवेदन पढ्न पाउँदा खुसी लागेको बताउँदै उहाँले हरेक प्रतिकूल परिस्थितिसित जो जुध्न सक्छ उही मात्र समयसँगै अघि बढ्न सक्छ भन्नुभयो । उहाँले भन्नुभयो – ‘नेपाल मजदुर किसान पार्टीका अध्यक्ष नारायणमान बिजुक्छेले समयमै ‘एक घर एक स्नातक’ को नारा उठाउनु, बेलैमा कलेजले जग्गा खरिद गर्नु, भवन निर्माण गर्नुलगायतका कामहरु समयअनुसार नै चालेका कदमहरु हुन् । यसले वागीश्वरीलाई अगाडि बढ्न धेरै मद्दत पु¥यायो । त्यसैले समयलाई सबैभन्दा बलबान भनिएको हो ।’
वागीश्वरीले पाठ्यपुस्तक र परीक्षामा मात्र उत्कृष्टता हासिल गर्ने नभई यहाँका हरेक विद्यार्थीलाई उतिकै असल र देशभक्त नागरिक बनाउन पनि सक्नुपर्ने आवश्यकतालाई जोड दिँदै उहाँले मिहिनेत परिश्रम गरेर सिक्ने संस्कार बसाल्न शिक्षकहरुलाई आग्रह गर्नुभयो ।
देशको युवा जनशक्ति बिदेसिनु समस्याको समाधान होइन भन्दै उहाँले नेपाली युवालाई नेपालमै भविष्य खोज्न उत्साहित गर्नुपर्ने बताउनुभयो ।
देशको शिक्षा क्षेत्र बिग्रनुमा यहाँका उच्च अधिकारीहरु जिम्मेवार रहेको कुरा वागीश्वरीले बेलैमा विभिन्न विषय अध्यापनको लागि सम्वन्धन माग्दा सम्बन्धन दिन नमानेको बरु पदमा रहेको व्यक्तिबाटै निराशा व्यक्त भएको चर्चा गर्दै उहाँले त्रिभुवन विश्विद्यालयका उपकुलपतिसँग पछिल्लो समयमा भएको भेटघाटबारे जानकारी दिनुभयो ।
विश्वविद्यालयअनुसार आयोगबाट वागीश्वरीलाई अब क्यु.ए.ए. पाउने अपेक्षा गर्दै उहाँले वागीश्वरीको अनुभव अरुलाई पनि काम लाग्ने बताउनुभयो ।

सभामा वागमती प्रदेशसभाका सदस्य सुरेन्द्रराज गोसाईले देशको आर्थिक शैक्षिकलगायतको अवस्था मात्र नभई अन्तर्राष्ट्रिय परिस्थिति पनि उतिकै खराब अवस्थाबाट गुज्रिरहेको चर्चा गर्दै उहाँले यस्तो बेलामा देशका बुद्धिजीवीहरु मौन रहनु बौद्धिक दरिद्रताको प्रदर्शन हो भन्नुभयो ।
संसारभरका शान्तिप्रेमी युद्ध विरोधी जनता प्यालेस्टाइनमाथि अमेरिकाको सहयोगमा इजरायलले गरिरहेको आक्रमणको विरोधमा उठिरहेको बेलामा यहाँका बुद्धिजीवीहरु, शासक र प्रतिपक्ष दलका नेताहरु फुटकर विषयमा समय खर्चिरहेको बताउनुभयो ।
गणतन्त्रको विरुद्ध राजतन्त्र पुनस्थापनाको विषय जबरजस्ती उठाई नेपाली जनतालाई विषयान्तर गर्न खोजिएको बेलामा नेपाल मजदुर किसान पार्टीले युद्धविरोधी संसारको आवाजमा आवाज थप्न ललितपुरमा युद्धविरोधी जुलुस गरेको सन्दर्भ कोट्याउनुभयो ।
प्यालेस्टिनी आम बालबच्चा र महिलाहरुको हत्या भइरहेको अवस्थामा सामाजिक न्यायको लागि पनि प्राध्यापक, शिक्षक विद्यार्थी सबैले आवाज उठाउनुपर्नेमा उहाँले जोड दिनुभयो ।
कलेज सभा सदस्य, पूर्व विद्यार्थी एवं वागमती प्रदेश सभा सदस्य सिर्जना सैजुले विद्यार्थीलाई पाठ्यक्रम र पाठ्पुस्तकमा मात्र सीमित गरेर असल र योग्य नागरिक बनाउन नसकिने आफ्नो अनुभव सुनाउँदै सं.रा. अमेरिका सिङ्गो संसारलाई आफ्नो नियन्त्रणमा राख्न अनेक प्रपञ्च गरिरहेको क्रा पाठ्यपुस्तकमा पाइँदैन भन्नुभयो ।
कुनै बेला बेलायत महाशक्ति थियो, त्यसपछि रुस महाशक्ति भएर उडायो, अहिले चीन महाशक्ति रुपमा उडाउँदै छ भन्दै उहाँले अमेरिका रुसलाई रोक्न युक्रेन युद्ध उचाल्दै छ भने मध्यपूर्वको इन्धन हात पार्न इजरायललाई उचालेर युद्ध भडकाउँदै छ, यसप्रति हामी सचेत हुनै पर्छ भन्नुभयो ।
नेपालको अर्थतन्त्र भारत निर्भर हुनु उतिकै खतरा हो भन्दै उहाँले देश उत्पादन शून्यको स्थितिमा पुग्न शासकहरुको गलत नीति र अकर्मण्यताको परिणाम हो, यसलाई विद्यार्थीसम्म प्रष्टयाउनुपर्ने दायित्व प्राध्यापकहरुको हो भन्नुभयो ।
सभामा भक्तपुर नगरपालिका उपप्रमुख रजनी जोशीले देशको बौद्धिक एवं युवा जनशक्ति विदेश पलायन हुनु साह्रै चिन्ताको विषय हो भन्दै उहाँले त्यसलाई रोक्न यहाँ पनि ‘लर्न एण्ड अर्न’ (पढ्दै कमाउँदै)को नीति लागु गर्नुपर्ने बताउनुभयो ।
कार्यक्रममा वडाध्यक्ष रवीन्द्र ज्याख्वले कलेजमा विद्यार्थीहरु स्थानीय विभिन्न विषयमा अनुसन्धानमा लगाउन सके यहाँको आवश्यकता बोध हुनुका साथै विद्यार्थीहरुमा व्यावहारिक ज्ञान हुनेमा जोड दिनुभयो ।
कार्यक्रममा प्राचार्य धनकुमार श्रेष्ठले कलेजको वार्षिक प्रतिबेदन (शैक्षिक, आर्थिक र भौतिक) प्रस्तुत गर्नुभएको थियो भने सभाले प्रतिबेदन सर्वसम्मत पारित गरेको थियो ।
सभामा क्युएएसम्बन्धी स्वअध्ययन समूहका संयोजक विनोद प्रजापतिले क्युएएबारे हालसम्म भएका गतिविधिबारे जानकारी दिनुभएको थियो । सभामा परीक्षा संयोजक विकल प्रजापतिले पनि बोल्नुभएको थियो ।

भक्तपुर – वागीश्वरी कलेज, वागीश्वरी कलेज अफ म्यानेजमेन्ट र वागीश्वरी माध्यमिक विद्यालयको संयुक्त आयोजनामा कलेज भवन उद्घाटन, दीपावली, नेपाल संवत ११४४ र छठको उपलक्ष्यमा शुभकामना आदानप्रदान तथा नवागन्तुक विद्यार्थीहरूलाई स्वागत एवं सांस्कृतिक कार्यक्रम कार्तिक २४ गते शुक्रबार सम्पन्न भएको छ ।
नेपाल मजदुर किसान पार्टीका केन्द्रीय अध्यक्ष नारायणमान बिजुक्छें (रोहित) को प्रमुख आतिथ्यमा सम्पन्न भएको उक्त कार्यक्रममा प्रमुख अतिथि बिजुक्छेंले पाठ्यक्रम–पाठ्यपुस्तकमा जति राम्रो बनाउने हो त्योभन्दा बढी राम्रो देश विदेशको परिस्थितिबारे जानकार बनाई विद्यार्थीलाई सचेत पारिराख्नुर्नेमा जोड दिनुभयो । देश र जनताको सेवा गर्ने भावनासहित देशभक्तिको चेत नभएमा हाम्रा विद्यार्थी नै भोलि हाम्रा विरोधी भएर निस्किन सक्छन्, त्यति बेला शिक्षकलाई पछुतो हुन सक्छ भन्दै उहाँले बढ्दो वैदेशिक हस्तक्षेपविरुद्ध प्रतिरोधको क्षमता हुनुपर्ने बताउनुभयो । उहाँले भन्नुभयो– “त्यसैले हामीले अठार वर्ष पूरा गरेका हरेक युवालाई सैनिक तालिम अनिवार्य गर्नुपर्छ भनेर सरकारलाई धेरै वर्षदेखि सुझाव दिइराखेका हौं तर, सरकारले सुनिरहेको छैन ।”
कलेजको नयाँ भवन निर्माण भएकोमा खुशी व्यक्त गर्दै उहाँले निर्माणमा जोड दिएजस्तै जोगाउनमा पनि उत्ति नै ध्यान दिनुपर्छ भन्नुभयो ।
समारोहका सभापति कलेज व्यवस्थापन समिति अध्यक्ष एवं भक्तपुर नगरपालिकाका प्रमुख सुनिल प्रजापतिले वागीश्वरी कलेजले सस्तोमा स्तरीय शिक्षा प्रदान गर्दै निरन्तर प्रगति गरिरहेकोमा सन्तोष व्यक्त गर्दै कलेजमा नयाँ नयाँ विषय थप्ने प्रयास भइरहेको जानकारी दिनुभयो ।
त्रिभुवन विश्वविद्यालयले निजी कलेजहरूको दवावमा सामुदायिक कलेजलाई नया“ नया“ विषयको सम्बन्धन नदिएको खुलासा गर्दै उहाँले बढ्दो सङ्ख्यामा नेपाली विद्यार्थीहरू विदेसिनुमा विश्वविद्यालयका जिम्मेवार व्यक्तिहरू नै दोषी छन् भन्नुभयो । हालै कार्यकाल पूरा गरेका त्रिविका उपकुलपतिले आफ्नो कार्यकालको एकतिहाइ समय तालाबन्द भोग्नु परेको भनी बताएबाट त्रिविको स्थिति छर्लङ्ग हुन्छ भन्दै उहाँले त्रिविका प्राध्यापकहरूले कन्सल्टेन्सीको रकम खाएकै कारण देशका १४४० कलेजमध्ये ५०० कलेज बन्दको स्थितिमा पुगेको हो भन्नुभयो । सरकारको एउटा गलत नीतिका कारण देशका २२८ नर्सिङ कलेज बन्द हुँदा नेपालको सीमावर्ती भारतीय क्षेत्रमा सयौं नर्सिङ कलेज पोसिएको बताउँदै उहाँले कृषि प्रधान देशमा कृषिमा विद्यार्थी अभाव हुनु विडम्बनापूर्ण छ भन्नुभयो ।
कार्यक्रमका अतिथि नेमकिपा केन्द्रीय सदस्य एवं बागमती प्रदेश सभा सदस्य सुरेन्द्रराज गोसाईंले एमसीसीका कारण देश अप्ठ्यारोमा पर्दै जाने निश्चित छ भन्ने कुरा हरेक क्षेत्रमा बढ्दो अमेरिकी हस्तक्षेपले पुष्टि गर्छ भन्दै नेपाली जनता यसमा सचेत नभए भोलि देशको अस्तित्व नै खतरामा पर्न सक्छ भनी सचेत पार्नुभयो ।
अमेरिकाको सहयोगमा इजरायलले विगत ३० दिनमा १० हजार प्यालेस्टिनी जनताको नरसंहार गरेको चर्चा गर्दै उहाँले इजरायलका प्रधानमन्त्री न्यतान्याहुले प्यालेस्टिनी अस्तित्व मेट्ने दुस्प्रयास गरेकै कारण वर्तमान युद्ध भएको हुँदा युद्धको जिम्मेवार इजरायल हो भन्नुभयो ।
नेपाल मजदुर किसान पार्टीका जनवर्गीय सङ्गठनहरू नेपाल क्रान्तिकारी विद्यार्थी सङ्घ र नेपाल क्रान्तिकारी युवा सङ्घले अन्तर्राष्ट्रिय कर्तव्यबोध गरी राजधानीमा हालै प्यालेस्टिनी जनताको पक्षमा इजरायली फासीवादको विरुद्ध ठूलो जुलुस आयोजना गरेको चर्चा गर्दै उहाँले भन्नुभयो– अरूलाई परेको अन्यायको विरुद्ध आवाज नउठाए भोलि हामीलाई कसैबाट अन्याय भए कसले आवाज उठाउँछ ? भनी प्रश्न गर्नुभयो । उहाँले भन्नुभयो– ‘‘संसारका न्यायप्रेमी जनता युद्धको विरोधमा छ, स्वतन्त्र प्यालेस्टाइनको पक्षमा छ । यस्तो विषयमा पनि शिक्षक विद्यार्थी जानकार हुन आवश्यक छ ।’
कार्यक्रममा भनपा ९ का वडाध्यक्ष एवं वागीश्वरी मावि व्यवस्थापन समितिका अध्यक्ष रवीन्द्र ज्याख्वले शिक्षा राज्यको दायित्व हो तर यहाँ शिक्षा किन्ने वस्तु बनाइएको छ, पैसा हुने र पैसा नहुने बीच शिक्षामा विभेद छ त्यसो हुनु हुँदैन भन्दै उहाँले वागीश्वरी स्कुलले आफ्नो वरिपरिका स्कुललाई पनि सक्दो सहयोग गर्दै आएको बताउनुभयो ।
कलेजका प्राचार्य धनकुमार श्रेष्ठले धन्यवाद ज्ञापन गर्नुभएको उक्त कार्यक्रममा वागीश्वरी मािवका प्रअ कृष्णप्रसाद धन्छाले विद्यालयको सङ्क्षिप्त प्रतिवेदन सुनाउनुभयो ।
कलेज भवन निर्माण उपभोक्ता एवं अनुगमन समितिका संयोजक ज्ञानसागर प्रजापतिले २०७६ साल मङ्सिर २१ गते शिलान्यास भई २०८० साल असार मसान्तसम्ममा भवन निर्माणमा पाँच करोड चौध लाख सन्तानब्बे हजार पाँच सय त्रिपन्न रूपैयाँ खर्च भएको विवरण प्रस्तुत गर्नुभयो । उहाँका अनुसार उक्त रकममध्ये बाग्मती प्रदेश, भक्तपुर नगरपालिका र विश्वविद्यालय अनुदान आयोगबाट दुई करोड अठहत्तर लाख सत्तासी हजार अन्ठानब्बे रूपैया र कलेजको आन्तरिक स्रोतबाट दुई करोड छत्तीस लाख दश हजार चार सय पचपन्न रूपैया खर्च भएको छ ।
प्रमुख अतिथि बिजुक्छेंले नवनिर्मित भवनको मूलढोकामा रिवन काट्नुका साथै ताम्रपत्र अनावरण गर्नुभएको थियो । मङ्गल धुनको पृष्ठमा भएको उक्त कार्यक्रमपछि कलात्मक पानसमा दीप प्रज्वलन गरी समारोह पनि उद्घाटन गर्नुभएको थियो ।
समारोहमा भवन निर्माणमा योगदान दिने इन्जिनियरद्वय गङ्गासागर प्रजापति र अमोद उलकलाई मायाको चिनोसहित सम्मान पत्र प्रदान गरिएको थियो भने निर्माण व्यवसायीद्वय प्रदीप गौतम र नरेश त्वायनालाई पनि मायाको चिनोसहित प्रशंसा पत्र प्रदान गरिएको थियो ।
कार्यक्रममा भनपा शिक्षा शाखा प्रमुख कृष्णप्रसाद कर्माचार्य, विद्यार्थी पूर्णिमा प्रजापति र कार्यक्रमका संयोजक काजल थापाले पनि शुभकामना मन्तव्य दिनुभएको थियो ।
कार्तिक २४ गते नै वागीश्वरी मावि च्याम्हासिंहमा पनि नवागन्तुक विद्यार्थीहरूलाई स्वागत, दीपावली, नेपाल संवत् ११४४ र छठको अवसरमा शुभकामना तथा सांस्कृतिक कार्यक्रम सम्पन्न भएको थियो ।
विव्यस अध्यक्ष रवीन्द्र ज्याख्वको प्रमुख आतिथ्य र प्रा.डा. सिद्धिवीर कर्माचार्यको विशेष आतिथ्यमा सम्पन्न उक्त कार्यक्रममा उत्कृष्ट विद्यार्थीहरूलाई पुरस्कार विवरण गरिएको थियो ।
विद्यार्थी श्रीशा दिदियाको सभापतित्वमा भएको उक्त कार्यक्रममा विव्यस छोरीमैया सुजखु, स.प्र.अ. उकेश सुवाल, कार्यक्रम संयोजक शिक्षक भानुभक्त हुमागाइँका साथै विद्यार्थी दुर्गा बस्नेतले पनि बोल्नुभएको थियो ।
कमलविनायक र च्याम्हासिंह दुवैतिर औपचारिक कार्यक्रमपछि सांस्कृतिक कार्यक्रम भएको थियो ।

भक्तपुर । वागीश्वरी कलेज व्यवस्थापन सङ्कायको आयोजनामा बी.बी.एस. दोस्रो वर्षका विद्यार्थीहरूको लागि नेपाल सरकारले गत जेठ १५ गते संसद्मा प्रस्तुत गरेको आ.व. २०८०/०८१ को बजेटबारे अन्तरक्रिया कार्यक्रम जेष्ठ २६ गते शुक्रबार सम्पन्न भयो ।
कार्यक्रममा वाग्मती प्रदेशसभाका सांसद सृजना सैंजूले नेपालको अर्थतन्त्र भारतीय एकाधिकार पुँजीको नियन्त्रणमा रहेसम्म देश उँभो नलाग्ने कुरामा विशेष जोड दिनुभयो ।
कृषि उत्पादन बढाउन चाहिने रासायनिक मलको सहज आपूर्ति नहुन र देशमै रासायनिक मल कारखाना नखुल्नुको कारण भारतीय एकाधिकार पुँजी नै हो भनी ठोकुवा गर्दै उहाँले नेपालको जलस्रोतमाथि पनि भारतले कब्जा जमाउँदै लगेका उदाहरण दिनुभयो ।
सरकारी स्वामित्वमा रहेका नेपाली उद्योगहरू निजीकरणको नाममा भारतीय पुँजीपतिलाई बेचिँदा आज युवाहरू श्रमको लागि विदेशमा भौतारिनु परेको चर्चा गर्दै उहाँले संविधानले निर्दिष्ट गरेको समाजवादउन्मुख देश बनाउन शिक्षा र स्वास्थ्य पूर्णरूपमा निःशुल्क गर्नुपर्नेमा जोड दिनुभयो ।
बजेट अङ्क गणित र आयव्ययको हिसाबकिताब मात्र नभई सरकारको दृष्टिकोण पनि हो भन्दै उहाँले संविधानले निर्दिष्ट गरेको समाजवादतर्फ यो बजेट कति उन्मुख भनेर हेर्नुपर्ने बताउनुभयो ।
विभिन्न कारणले संसारमा देखापरेका आर्थिक सङ्कटको निराकरण समाजवादी अर्थतन्त्रले मात्र गर्न सकेका उदाहरणहरू दिँदै उहाँले शिक्षा क्षेत्रमा पर्याप्त बजेट नछुट्याइँदा शिक्षाको आर्थिक दायित्व अभिभावकको थाप्लोमा परेको बताउनुभयो ।

कार्यक्रममा नेपाल क्रान्तिकारी शिक्षक सङ्घका केन्द्रीय अध्यक्ष एवम् कलेजका संयोजक ज्ञानसागर प्रजापतिले सरकारको जुनसुकै क्षेत्रमा जतिसुकै बजेट छुट्याए पनि विश्वास गर्न नसकिने चर्चा गर्दै भन्नुभयो, “ढाँटको निम्तो खाई पत्याउनु भनेझैँ विकासको परिणाम नआएसम्म पत्याउन सकिँदैन ।”
कलेजको अर्थशास्त्र विभागका प्रमुख मुरज दिदियाले कक्षामा पढेका सैद्धान्तिक कुरालाई व्यवहारको कसीमा हेर्न यस्तो कार्यक्रमको आयोजना गरेको भन्दै भन्नुभयो, “अर्थशास्त्र विषय लिई पढ्ने विद्यार्थीको लागि यो प्रयोगात्मक कक्षा हो ।”
उहाँले भन्नुभयो, “विदेशमा पढ्न जाने विद्यार्थीलाई निरुत्साहित गर्न कर दुई प्रतिशतबाट तीन प्रतिशत गरिएको छ; यसले विदेश जाने विद्यार्थीलाई रोक्न सक्दैन । बरु विदेशको भन्दा राम्रो पढ्ने वातावरण यही बनाउनुपर्छ ।”

कलेजका प्राचार्य धनकुमार श्रेष्ठको सभापतित्वमा भएको उक्त कार्यक्रममा शिक्षकहरू पूर्णभक्त दुवाल, बालगोपाल श्रेष्ठ र मङ्गलेश्वर ध्वोजूसहित विद्यार्थीहरू विकास श्रेष्ठ, श्रीकृष्ण ब्यान्जु, स्मृति कासुला र रजित किसीले पनि बजेटका विभिन्न पक्षमा समीक्षात्मक टीकाटिप्पणी गर्नुभएको थियो ।

भक्तपुर । नेपाल मजदुर किसान पार्टीका अध्यक्ष एवम् वरिष्ठ राजनीतिज्ञ नारायणमान बिजुक्छेँ (रोहित)ले वागीश्वरी माविको ६३ औँ र वागीश्वरी कलेजको १४ औँ वार्षिकोत्सव कार्यक्रम चैत्र ४ गते आइतबार एक समारोहबीच पानसमा दीप प्रज्ज्वलन गरी उद्घाटन गर्नुभयो ।
वार्षिकोत्सव समारोहमा अध्यक्ष बिजुक्छेँले वागीश्वरी माविका तीन जना शिक्षकहरू कृष्णप्रसाद कर्माचार्य, रेणुकामैंया प्रजापति र उकेश सुवाललाई दीर्घ सेवा सम्मान गर्नुभयो ।
कार्यक्रममा अध्यक्ष बिजुक्छेँले वागीश्वरीले गरेको सामूहिक कामकै कारण यसप्रति सबैको अपनत्व कायम रहेको र सबैले गौरवान्वित महसुस गरेको बताउनुभयो । विद्यालयहरूले असल र २१ औं शताब्दीको निम्ति योग्य बौद्धिक शक्ति तयार पार्न जोड दिनुपर्ने भन्दै उहाँले देशको राजनीतिबारे अनभिज्ञ व्यक्तिले देश र जनताको हितमा काम गर्न नसक्ने बताउनुभयो ।
संसारका हरेक लडाइँ तथा युद्धहरूमा साम्राज्यवादी र पुँजीपतिहरूको हात हुने गरेको चर्चा गर्नुहुँदै अध्यक्ष बिजुक्छेँले नेपालमा पनि अहिले पश्चिमा देशहरूको प्रभाव धेरै बढिरहेको छ भन्नुभयो ।
संयुक्त राज्य अमेरिकाले रुसको विरोधमा गरिरहेको लडाइँ विचार र सिद्धान्तको नभई आर्थिक प्रभावको युद्ध भएको बताउनुहुँदै उहाँले युक्रेन युद्ध हुनुमा संयुक्त राज्य अमेरिका नै दोषी भएको बताउनुभयो ।
नेपालमा एमसीसी पारित भएसँगै नेपाललाई पनि नाटो सङ्गठनको सदस्य बनाउन खोजिएको बताउनुहुँदै नेता बिजुक्छेँले युक्रेनको अहिलेको अवस्था आउनुमा दशकौँ अगाडिदेखिको अमेरिकाको साम्राज्यवादी नीति नै जिम्मेवार भएको बताउनुभयो ।
कार्यक्रममा भक्तपुर नपाका प्रमुख एवम् कलेज सञ्चालक समितिका अध्यक्ष सुनिल प्रजापतिले सामुदायिक र निजी विद्यालयहरूबीच आपसी प्रतिस्पर्धा, गुणस्तरमा समानता ल्याउने प्रयत्न गरिएको बताउनुहुँदै शिक्षालाई स्तरीय र बलियो बनाउनुपर्छ भन्ने उद्देश्यले भक्तपुरमा सञ्चालित अधिकांश सामुदायिक विद्यालयहरूको शैक्षिकस्तरमा सुधारका प्रयासहरू भइरहेको बताउनुभयो ।
भक्तपुरको शैक्षिक स्थिति आजको अवस्थासम्म आउनुमा भक्तपुरका अगुवाहरूको महत्वपूर्ण योगदान रहेको चर्चा गर्नुहुँदै उहाँले भक्तपुर नपाबाट सञ्चालित कलेजहरूले अध्ययन अनुसन्धानमा विशेष जोड दिँदै आएको बताउनुभयो ।
भक्तपुर नपाले विद्यालयहरूको भौतिक सुधारको लागि आवश्यक अनुदानको व्यवस्था गर्दै स्थानीय विषयमा पठनपाठनको लागि स्थानीय पाठ्यक्रमको समेत व्यवस्था गरिएको बताउनुहुँदै इतिहास, भूगोल, राजनीतिशास्त्र, संस्कृति र नेपालभाषा पढ्ने विद्यार्थीहरूको लागि पूर्ण छात्रवृत्तिको व्यवस्था गरिएको बताउनुभयो ।
त्यस्तै बागमती प्रदेशसभा सदस्य सुरेन्द्रराज गोसाइँले वागीश्वरीले हासिल गरेको सफलता र उपलब्धीहरू आगामी दिनहरूमा पनि सशक्त ढंगले अगाडि बढ्ने विश्वास व्यक्त गर्नुभयो ।
महामारी वा कुनै प्रतिकुल अवस्थामा शिक्षा क्षेत्र प्रभावित हुन नहुने बताउनुहुँदै सांसद गोसाइँले शिक्षा क्षेत्रमा सरकारको उदासिनता देखिएकै कारण शिक्षा क्षेत्रले अपेक्षित ढङ्गले प्रगति गर्न नसकेको बताउनुभयो । उहाँले एमसीसीको ५५ अर्ब नेपालको लागि उपलब्धीमूलक नहुने बताउनुभयो ।
बागमती प्रदेशसभा सदस्य सृजना सैंजुले वागीश्वरीले असल र देशभक्त नागरिक जन्माउने अभिभारा बोकेको बताउनुहुँदै राष्ट्रिय तथा अन्तर्राष्ट्रिय सवालहरूमा वागीश्वरीले खेलेको भूमिका चर्चायोग्य भएको बताउनुभयो ।
संयुक्त राज्य अमेरिकाले युक्रेनमा गरेको युद्ध र हस्तक्षेप आज संसारसामु नाङ्गिँदै गएको बताउनुहुँदै उहाँले रुसले नेटो सेनाविरुद्ध प्रतिकार गरेकै कारण आज यो अवस्था आएको बताउनुभयो ।
साथै वागीश्वरी माविका प्रअ कृष्णप्रसाद धन्छा र वागीश्वरी कलेजका प्राचार्य धनकुमार श्रेष्ठले वागीश्वरी मावि तथा कलेजको प्रगति प्रतिवेदन प्रस्तुत गर्नुभयो ।
वागीश्वरी मावि सञ्चालक समितिका अध्यक्ष रबिन्द्र ज्याख्वको सभापतित्वमा भएको उक्त कार्यक्रममा वागीश्वरी प्लस टुका संयोजक ज्ञानसागर प्रजापति, वागीश्वरी कलेजका तर्फबाट त्रिविका उत्कृष्ट विद्यार्थी बबिता ग्वाछा, विद्यार्थीहरू सुनिता दाहाल, सुजी ह्योङ्ग्वजु, शिक्षक राजन लाखा र मङ्गलेश्वर ध्वजुले पनि बोल्नुभएको थियो ।
कार्यक्रमका प्रमुख अतिथि नारायणमान बिजुक्छेँ (रोहित) ले कलेजको स्मारिका र जर्नलसमेत विमोचन गर्नुभएको थियो । साथै प्रमुख अतिथि, विशेष अतिथि तथा अतिथिहरूले उत्कृष्ट विद्यार्थी, कर्मचारी र भ्वाइस अफ वागीश्वरीका विजेताहरूलाई सम्मान गरेको थियो ।

भक्तपुर, २५ मङ्सिर । वागीश्वरी कलेजको नवौँ कलेज सभा साविककै कलेज व्यवस्थापन समिति पुनर्गठन गरी सम्पन्न भएको छ । समितिका अध्यक्ष सुनिल प्रजापतिको सभापतित्वमा भएको उक्त सभामा उहाँले पुनः काम गर्ने अवसर दिइएकोमा समितिकै तर्फबाट हार्दिक आभार व्यक्त गर्नुभयो ।
विगत चौध वर्षदेखि काम गर्दै आएको उल्लेख गर्दै उहाँले आगामी दिन थप व्यवस्थित ढङ्गले काम गर्ने प्रतिबद्धताका साथ भक्तपुरको शैक्षिक प्रगतिलाई बौद्धिक जगतले मिहिन रूपमा हेरिरहेको हुँदा हामीले आफूलाई सोही अनुरूप सचेत र सक्रिय हुनुपर्ने बताउनुभयो ।
कोरोना महमारीको बेला अक्सिजन अभाव हुँदा वागीश्वरी स्कुल र कलेजबाट सुरु भएको आर्थिक सहयोग सङ्कलन अन्ततः करोडौँ रकम सङ्कलन भई आज निःशुल्क रूपमा जनताले अक्सिजन पाइरहेको चर्चा गर्दै कलेजले पठनपाठनका अतिरिक्त जनताको थप सेवा गरेकोमा भनपाको तर्फबाट सहयोगी सबैप्रति हार्दिक आभार व्यक्त गर्नुभयो ।
शिक्षामा विदेशी लगानीप्रति सचेत हुनुपर्ने औंल्याउँदै उहाँले विदेशीसँग प्रतिस्पर्धा गर्न सक्ने जनशक्ति उत्पादन गर्नुपर्ने जोड दिनुभयो ।
आत्मनिर्भरता विशेष जोड दिनुपर्ने उल्लेख गर्दै उहाँले भन्नुभयो– “सधैँ विदेशी र सरकारी मुख ताकिरहनुभन्दा आफ्नै बलबुत्तामा गरेको प्रगति बढी दिगो हुन्छ र त्यसमा अपनत्वभाव धेरै हुन्छ ।”
अनुसन्धानमा छुट्याइएको रु. २८ लाख बजेट खर्च गर्न आवश्यक प्रक्रिया अगाडि बढाउन सुझाव दिँदै उहाँले अनुसन्धान आजको आवश्यकता हो भन्नुभयो ।
नेमकिपाले शिक्षालाई पहिलो प्राथमिकता दिँदै आएको हुँदा आज बौद्धिक जगतमा यसलाई ‘ख्वप मोडेल’ भन्न थालेको चर्चा गर्दै त्यो मोडेलभित्र वागीश्वरी कलेज पनि पर्ने उहाँले बताउनुभयो ।
‘सरकारी नीति एउटै परिसरमा दृढता शैक्षिक संस्था सञ्चालन गर्न नहुने भन्ने छ तर हामी एउटै संस्थामा पनि बिहान, दिउँसो र बेलुकाको सिट सञ्चालन गरेर भवनलाई अधिकतम उपयोग गर्दै छौँ । सरकार स–साना स्कुल मर्ज गर्न खोज्छ, हामी स साना स्कुललाई सबल बनाउन खोज्छौँ । यही हाम्रो विशेषता हो ।’ उहाँले भन्नुभयो ।
वागीश्वरी स्कुलले सिद्धिशारदा प्रावि र ब्रह्मचारिणी प्रावि सबल बनाए जस्तै अब गणेश मावि भार्वाचोले उदय प्राविलाई सबल बनाउन जिम्मा दिएको पनि उहाँले जानकारी दिनुभयो ।
अब वागीश्वरी कलेजले भक्तपुर अन्य कलेजहरूसँग पनि सहकार्य गरी सिङ्गो भक्तपुरको शैक्षिक प्रगतिमा योगदान पु¥याउने प्रयास आगामी दिन गर्दै जाने पनि उहाँले प्रष्ट्याउनुभयो ।
सभामा संविधान सभासद् अनुराधा थापामगरले कलेजले देशभक्त नागरिक तयार गर्न सकोस भन्ने शुभेच्छा व्यक्त गर्नुभयो भने बाग्मती प्रदेशसभा सदस्य सिर्जना सैंजूले विद्यार्थीलाई पाठ्यपुस्तकमा मात्र सीमित नगरी देशी र विदेशी समसामयिक विषयमा पनि अद्यावधिक गरिराख्नुपर्नेमा जोड दिँदै राष्ट्रघाती एमसीसीविरुद्ध सम्पूर्ण विद्यार्थीलाई जागरुक बनाउनुपर्नेमा जोड दिनुभयो ।
भक्तपुर नगरपालिकाका उपप्रमुख रजनी जोशीले भक्तपुर शैक्षिक गन्तव्यको रुपमा विकास भइरहेको सन्दर्भमा वागीश्वरी कलेजको पनि महत्वपूर्ण योगदान रहेको बताउनुभयो भने वडाध्यक्ष रवीन्द्र ज्याख्वले सामुहिक नेतृत्वबाटै कलेजको प्रगति सम्भव भएको बताउनुभयो ।
प्राचार्य धनकुमार श्रेष्ठले सभामा अनुमोदनका लागि विभिन्न चार ओटा प्रस्ताव पेश गर्नुभयो– पहिलो प्रस्तावमा कलेज व्यवस्थापन समिति साविकलाई कार्यकाल थप गर्ने, दोस्रो प्रस्ताव कलेज विधान पारित गर्ने, तेस्रो आगामी पाँच वर्षको रणनीतिक योजना पारित गर्ने र चौथौं २०७८÷०७९ को बजेटका साथै ०७७÷०७८ को लेखा प्रतिवेदन अनुमोदन गर्ने ।
प्रस्तावित चारओटै प्रस्तावहरू आवश्यक संशोधनसहित सभाले पारित गरेको छ ।
सभामा वागीश्वरी माविका प्रधानाध्यापक कृष्णप्रसाद धन्छा, संयोजक ज्ञानसागर प्रजापति, सभाका सदस्यहरू डा. राजुभाइ त्यात, डा. किशोर हाकुदुवाल, डा. बलराम दुवालले पनि विभिन्न सुझावहरू दिनुभएको थियो ।

भक्तपुर– वागीश्वरी कलेज तथा वागीश्वरी माविको संयुक्त आयोजनामा कार्यरत शिक्षक तथा कर्मचारीहरूबीच बुधबार नजिकिँदै गरेको वडादशैँ २०७८ को अवसरमा शुभकामना आदानप्रदान कार्यक्रम सम्पन्न भयो ।
कार्यक्रममा कलेज व्यवस्थापन समितिका अध्यक्ष एवम् भक्तपुर नगरपालिकाका प्रमुख सुनिल प्रजापतिले वैदेशिक लगानीबाट पुग्ने क्षतिबारे चर्चा गर्दै विदेशीको भरमा हुने कुनै पनि संस्थाको प्रगति दिगो नहुने बताउनुभयो ।
सरकारले शिक्षा क्षेत्रमा गरेको लगानी निकै न्यून र अपुग भएको बताउनुहुँदै उहाँले प्राध्यापक तथा कर्मचारीहरू पैसा कमाउने मानसिकता र व्यक्तिगत स्वार्थबाट माथि उठेर संस्थाको हित र उत्थानमा भूमिका खेल्नुपर्ने बताउनुभयो ।
भक्तपुरका विद्यार्थीहरूलाई यहीँ गुणस्तरीय शिक्षा आर्जन गर्ने वातावरण प्रदान गर्न जोड दिनुहुँदै नगर प्रमुख प्रजापतिले भक्तपुरको पहिचान र गरिमा कायम गर्न स्थानीय जनताहरूको महत्वपूर्ण भूमिका रहेको बताउनुभयो । स्नातकोत्तर तहका विद्यार्थीहरूमा अरुको थेसिस नक्कल गर्दै आफू उत्तीर्ण हुने गलत मानसिकता हावी हुँदै गइरहेको बताउनुहँदै उहाँले नजिकिँदै गरेको दशँको बिदाको समयको सदुपयोग गरी नयाँ नयाँ पुस्तक अध्ययन गरी सिर्जनशील काममा लाग्न प्रेरित गर्नुभयो ।
वागीश्वरी मावि तथा कलेजका संयोजक ज्ञानसागर प्रजापतिले स्वाभिमानलाई बन्धक राखेर पाइने कुनै पनि वैदेशिक सहयोग हामी दुत्कार्छौँ भन्नुहुँदै वागीश्वरीमा अनेक विदेशी सङ्घ संस्थाले अनेक प्रलोभन देखाउन आएका दृष्टान्त दिनुभयो ।
वागीश्वरी कलेजका प्राचार्य धनकुमार श्रेष्ठले सामूहिक भावनाको विकासले संस्थालाई अगाडि बढाउन टेवा पुग्ने बताउनुहँदै वागीश्वरी कलेजले अनुसन्धानमा २६ लाख बजेट छुट्याउँदै आएको र विभिन्न विषयमा कार्यशाला गोष्ठीहरू पनि गर्दै आइरहेको बताउनुभयो ।
वागीश्वरी माविका प्रधानाध्यापक कृष्णप्रसाद धन्छाले धन्यवादज्ञापन गर्नुभएको उक्त कार्यक्रममा सहायक प्रअद्वय कृष्णप्रसाद कर्माचार्य र उकेश सुवाल, विज्ञान सङ्कायका भानुभक्त हुमागाइँ, वागीश्वरी मावि टेक्स कार्यक्रमका संयोजक दिनेश प्रधान, वागीश्वरी कलेज व्यवस्थापन सङ्कायका प्रमुख बब्लुकुमार राउत र ग्याहेन्द्रप्रसाद दाहालले शुभकामना मन्तव्यका साथै आ–आफ्नो धारणा राख्नुभएको थियो ।