Category: Uncategorized

भक्तपुर । वागीश्वरी माध्यमिक विद्यालय, वागीश्वरी कलेज र वागीश्वरी कलेज अफ म्यानाजमेन्टको संयुक्त आयोजनामा तिहार, न.सं.११४६ र छठ पर्वको अवसरमा शुभकामना तथा नवआगन्तुक विद्यार्थीहरुलाई स्वागत तथा सांस्कृतिक कार्यक्रम कार्तिक २ गते आइतबार सम्पन्न भएको छ ।

कार्यक्रमका प्रमुख अतिथि एवम् वागीश्वरी कलेज व्यवस्थापन समितिका अध्यक्ष तथा भक्तपुर नगरपालिकाका प्रमुख सुनिल प्रजापतिले समाजवादउन्मुख शिक्षा प्रणाली लागु नगरी पूजीबादउन्मुखलाई जोड दिएकाले गुणस्तरीय शिक्षामा सबैको पहुँच नपुगेको बताउनुभयो । देशको शैक्षिक कार्यक्रम आत्मनिर्भरतामा केन्द्रित हुनुपर्नेमा राज्यले विदेशमुखी बनाएको उहाँले स्पष्ट पार्नुभयो । भक्तपुर नगरपालिकाले समाजवादउन्मुख शिक्षा प्रणालीलाई केन्द्रित गरी विभिन्न शैक्षिक कार्यक्रमहरु सञ्चालनमा ल्याएको उहाँको भनाइ छ । साथै उहाँले वैदेशिक रोजगारीको नाउँमा जनतालाई राज्यले खरिदविक्रीको वस्तु बनाइराखेको औल्याउनुभयो । एक हातमा शैक्षिक प्रमाणपत्र र अर्को हातमा सिप भएकाले कहिल्यै बेरोजगार हुन नपर्ने बताउँदै भक्तपुर नगरपालिकाले व्यवहारिकतालाई ध्यानमा राखी सिपमूलक तालिमहरु गर्दै आएको बताउनुभयो ।
उहाँले एनजीओ र आइएनजीओहरुले देशका नेताको दिमागलाई खोक्रो पारेको बताउँदै शिक्षा क्षेत्रलाई सेवाभन्दा व्यापारीक थलोको रुपमा विकास गरेको बताउनुभयो । राज्यको शिक्षा नीतिले विद्यालय र कलेजबाटै गरिब र धनीबीचको वर्गभेद छुट्याएको उहाँले स्पष्ट पार्नुभयो । उहाँले पुँजीवादी व्यवस्थाभन्दा समाजवादी व्यवस्थामा बहुसंख्यक जनताको हित हुने बताउँदै रिजरभ्वायरमै फोहोर पानी छ भने घर घरमा आउने पानी सफा हुन नसक्ने औंल्याउनुभयो । साथै सरकारले हरेक पटक नाफाकै निम्ति काम गरेकाले राम्रो शैक्षिक कार्यक्रमको स्वीकृति दिन नमानेको स्पष्ट पार्नुभयो ।
वागीश्वरी कलेज अफ म्यानाज्मेन्टका प्राचार्य कृष्णप्रसाद धन्छाले ध्वंश मात्र गर्न जान्ने र निर्माण गर्न नजान्नेलाई बाँदरे प्रवृत्तिको संज्ञा दिँदै वागीश्वरीका विद्यार्थी देश बनाउनका लागि नमूनासावित भइरहेको बताउनुभयो । उहाँले अहिलेका नयाँ पुस्ताले प्रविधिको सही सदुपयोग गर्न सकेमा देश बन्ने औंल्याउनुभयो । साथै इजरायलले प्यालिस्टिनी जनताको नरसंहारविरुद्ध वागीश्वरीले निरन्तर आवाज उठाइरहेको बताउँदै वागीश्वरीका विद्यार्थी राष्ट्रिय अन्तर्राष्ट्रिय विषयमा ज्ञान लिइरहेको स्पष्ट पार्नुभयो ।
वागीश्वरी कलेज व्यवस्थापन समितिका सदस्य ज्ञानसागर प्रजापतिले नेपाली जनताको काँधमा आएको २७ अर्ब राज्यको ऋण मोचन गर्ने नयाँ शंखधरको खोजी भैरहेको बताउँदै नयाँ पुस्ताले राज्यलाई दुबाउने भ्रष्टहरुको विरुद्ध निरन्तर आवाज उठाउनुपर्नेमा जोड दिनुभयो । वागीश्वरीले स्वाधिनता र स्वाभिमानलाई बेचेर कुनै काम नगरेको स्पष्ट पार्दै उहाँले सबैसँग इमानदारीता भएको भए देश खादलमा नपर्ने बताउनुभयो । नयाँ पुस्ताले डिजिटल प्रविधिलाई रचनात्मक कार्यका रुपमा उपयोग गर्न जोड दिँदै आफ्नो ऊर्जालाई देश र जनताको सेवामा समर्पित गर्नुपर्ने बताउनुभयो । नयाँवर्षसँगै वागीश्वरीले विभिन्न तालिम तथा कार्यक्रमहरु ल्याएको उहाँले स्पष्ट पार्नुभयो ।
विद्यालयका प्रधानाध्यापक कृष्णप्रसाद कर्माचार्यले पढाइसँगै विद्यालयबाट गरेका अतिरिक्त क्रियाकलापहरुबारे स्पष्ट पार्नुभयो । विद्यालयको आचारसंहितालाई अक्षरस पालना गर्न जोड दिँदै उहाँले असल नागरिकको रुपमा देश र जनताको पक्षमा आफ्नो अध्ययनलाई सदुपयोग गर्नुपर्ने बताउनुभयो ।
वागीश्वरी कलेजका प्राचार्य धनकुमार श्रेष्ठले विद्यार्थीहरुको क्षमतालाई अभिवृद्धि गर्न सैद्धान्तिकसँगै व्यवहारिक सिपमूलक कार्यमा कलेजले जोड दिइरहेका बताउनुभयो । आजका विद्यार्थीले डिजिटल प्रविधिविना जीवनलाई सार्थक बनाउन नसक्ने बताउँदै उहाँले सफल जीवनका लागि सफल मार्ग निर्देशकको खाँचो हुने औंल्याउनुभयो । साथै शिक्षालाई सिपसँग नजोडी महत्वपूर्ण भाग वाह्य शक्तिबाट निर्देशित हुने हो भने देश दुर्घटनामा पर्ने उहाँको कथन छ ।
वागीश्वरी कलेजको रिसर्च म्यानाज्मेन्ट कमिटीका संयोजक प्राध्यापक डा. सिद्धिवीर कर्माचार्यले देशका कोही नेताको दम्भ र अहंकारले देश पछि धकेलेको स्पष्ट पार्दै देशको मुहार फेर्न विद्यार्थीहरुले निरन्तर इमान्दारिपूर्वक काम गर्नुपर्ने बताउनुभयो । साथै उहाँले भक्तपुरका हरेक पर्व कसैसँग मेल नखाने भएकोले पहिलो पर्व भएको स्पष्ट पार्नुभयो ।
वागीश्वरीका नवआगन्तुक विद्यार्थीहरु सहदेव ढकाल, जेनी सुकमनीलगायतले खुशी व्यक्त गरेको उक्त कार्यक्रममा नितु चौरासिया, जेनिस बाँडे, लक्मी तामाङ, क्रिषला प्रजापतिले पनि बोल्नुभएको थियो ।
औपचारिक कार्यक्रमपश्चात विद्यार्थीहरुबाट सांस्कृतिक विधा प्रस्तुत गरेको थियो ।

भक्तपुर १९ भाद्र । वागीश्वरी कलेज कमलविनायकमा शैक्षिक सत्र २०८२ को स्नातक तहमा भर्ना भएका नयाँ विद्यार्थीहरुको लागि स्वागत तथा अभिमुखीकरण कार्यक्रम सम्पन्न गरियो । बीए, बीएएसडब्लु र बीबीएसमा भर्ना भएका विद्यार्थीहरुलाई स्वागत गर्दै कलेज व्यवस्थापन समितिका सदस्य एवं संयोजक ज्ञानसागर प्रजापतिले वागीश्वरी स्कुल होस वा कलेज नमुना लायक शैक्षिक संस्था हुँदा सोही अनुरूप विद्यार्थीहरु पनि नमुना योग्य हुनुपर्नेमा जोड दिनुभयो ।
स्नातकको अर्थ शास्त्री भएकाले अबको पढाइ विद्यालय तहको भन्दा फरक हुने चर्चा गर्दै उहाँले अब विद्यार्थीहरु विगतमा जस्तो आलाकाँचा स्वभाव नहुने बरु पढाइप्रति अत्यन्त गम्भीर बन्ने अनुभव सुनाउनुभयो ।
विद्यार्थीले आर्जन गर्ने ज्ञान, सीप यही देशको लागि उपयोग गर्नुपर्नेमा जोड दिँदै उहाँले नेपाली युवा विदेसिदा देश युवाविहीन अवस्थामा पुग्नु अत्यन्त दुःखद विषय हो भन्नुभयो । उहाँले भन्नुभयो–‘आमाको काखभन्दा पराइको लाख ठूलो हुनै सक्दैन । हाम्रो पढाइ हाम्रै देश र समाजको लागि हुनुपर्दछ ।
कार्यक्रममा वागीश्वरी कलेज अफ म्यानेजमेन्टका प्राचार्य कृष्णप्रसाद धन्छाले विश्वविद्यालयीय शिक्षा अनुसन्धानमा जोड दिइने हुँदा विद्यार्थीहरुमा धैर्यको धेरै खाँचो हुन्छ, हडबडाउनु हुँदैन भन्नुभयो । अबको चार वर्ष समर्पित भएर पढाइमा लाग्न अनुरोध गर्दै उहाँले आफूले रोजेको विषय कसैले होच्याउँदैमा नहोचिने बरु आफ्नो विषयमा गौरव गर्न जान्नुपर्छ भन्नुभयो ।
कार्यक्रममा वागीश्वरी मा.वि.का प्रधानाध्यापक कृष्णप्रसाद कर्माचार्यले विहान कलेजमा पढ्ने विद्यार्थीले दिउँसो वागीश्वरी स्कुलको टेक्स कार्यक्रमका तालिमहरुमा सहभागी भए शैक्षिक योग्यताका साथै थप एउटा सिप पनि हुने सुझाव दिनुभयो । उहाँले भन्नुभयो – ‘यसवर्ष हामी पच्चीस जनाको बालविकास सहजकर्ता सम्बन्धी २४ महिने निःशुल्क तालिम सञ्चालन गर्दै छौँ, सहभागी हुन चाहनेले नाम दर्ता गर्नुहोला ।’
कलेजका प्राचार्य धनकुमार श्रेष्ठको सभापतित्वमा भएको उक्त कार्यक्रममा टीयु टपर बबिता ग्वाछाले पढ्ने तौर तरिका सहित वागीश्वरीमा आफू पढ्ढाका अनुभव सुनाउनुभयो ।
मानविकी सङ्कायका इन्चार्ज राजन फेलुले पनि बोल्नुभएको सो कार्यक्रममा अध्ययनरत विद्यार्थीद्वय स्मृति कासुला र सविना बाडेले पनि बोल्नुभएको थियो भने नवआगन्तुक विद्यार्थीको तर्फबाट महेश बस्नेतले पनि बोल्नुभएको हो ।

भक्तपुर, १७ जेठ । वागीश्वरी कलेजमा क्षमता अभिवृद्धिबारे भइरहेको तीनदिने तालिम शनिबार सम्पन्न भएको छ । विश्वविद्यालय अनुदान आयोगको सहयोगमा भएको उक्त तालिम समापन कार्यक्रममा कलेज व्यवस्थापन समितिका अध्यक्ष एवं भक्तपुर नगरपालिकाका प्रमुख सुनिल प्रजापतिले सबैको क्षमता उत्तिकै नहुने चर्चा गर्दै व्यक्ति व्यक्तिको क्षमता फरक फरक हुन्छ; तर म जतिको जान्ने कोही छैन भनी घमण्ड गर्न नहुने सुझाव दिनुभयो ।
आफ्नो कमजोरी प्रायः आफूलाई थाहा नहुनसक्छ; त्यस्तो अवस्थामा अरूले गर्ने आलोचनालाई आत्मालोचना गरेर आफूलाई सुधार्नुपर्ने हुन्छ भन्दै उहाँले यसरी नै अनेक आलोचनाहरूबाट सिक्दै आजको सुशासनयुक्त भक्तपुर बनेको हो भन्नुभयो ।
चालीस वर्ष पहिले भक्तपुर र हालको भक्तपुरबारे पूर्वन्यायाधीश प्रकाश वस्तीले तुलना गर्दै हालको स्वच्छ भक्तपुरको मूल कारण सुशासन भनी लेखेको पनि उहाँले स्मरण गर्नुभयो । सोही सन्दर्भमा हालैमात्र ‘नागरिक’ दैनिकले ‘सुशासन हेर्न भक्तपुर जाऔँ’ भनी सम्पादकीय नै लेखेको उल्लेख गर्दै उहाँले भन्नुभयो, “सिक्ने र सिकाउने कहिल्यै नटुङ्गिने प्रक्रिया हो ।”
सरकारले शिक्षामा बर्सेनि बजेट घटाउँदै लगेकोमा विमति जनाउँदै विद्यालय मर्ज गर्ने सरकारी नीति गलत छ भन्नुभयो ।
पूर्वाधार हुँदाहुँदै पनि सरकारले ख्वप विश्वविद्यालय विधेयकलाई बेवास्ता गरेको आक्रोश व्यक्त गर्दै उहाँले सरकारको बजेटबाट निजी क्षेत्र खुसी भएको हुँदा यो आम गरिब जनताको सरकार हैन भन्ने पुष्टि हुन्छ भन्नुभयो ।
घरदैलो नर्सिङ सेवाबाट प्राप्त तथ्याङ्ककै आधारमा शैक्षिक ऋण र ठाउँठाउँमा शारीरिक व्यायामशालाहरू बनाएको चर्चा गर्दै उहाँले अनुसन्धान पैसा कमाउनु हेतुले भन्दा पनि देश र जनताको सेवा गर्ने हेतुले गर्नुपर्ने बताउनुभयो ।
कार्यक्रममा कलेजका संयोजक ज्ञानसागर प्रजापतिले उच्च दक्ष क्षमता नै मानिसको व्यक्तित्वको आधार हो भन्दै तालिममा सहभागी मित्रहरूमा अब विभिन्न विषयमा राष्ट्रिय अन्तर्राष्ट्रिय सम्मेलन गर्ने क्षमता वर्तमान कलेजको आवश्यकता हो भन्नुभयो ।
तालिममा सिकेका सीप व्यवहारमा नउतारे तालिम लिनु निरर्थक हुने पनि उहाँले बताउनुभयो ।
वागीश्वरी कलेज आरएमसीका इन्चार्ज प्रा.डा. सिद्धिवीर कर्माचार्यको सभापतित्वमा भएको उक्त कार्यक्रममा वागीश्वरी माविका प्रअ कृष्णप्रसाद कर्माचार्य, तालिमका सहभागीद्वय रविन मानन्धर (काभ्रे बहुमुखी क्याम्पस) र सुशीला घजु (वागीश्वर कलेज) ले तालिमको अनुभव सुनाउँदै सिकेको सीप व्यवहारमा उतार्ने प्रतिबद्धता व्यक्त गर्नुभयो ।
कलेजका प्राचार्य धनकुमार श्रेष्ठले आगामी दिनमा हुने हरेक कार्यक्रममा यस्तै उत्साहजनक सहभागिताको अपेक्षा गर्दै सहयोगी विश्वविद्यालय अनुदान आयोगप्रति आभार व्यक्त गर्नुभयो ।
कार्यक्रममा सहभागीहरूलाई अतिथि प्रजापतिले प्रमाणपत्र वितरण गर्नुभएको थियो ।

भक्तपुर । वागीश्वरी कलेज, तुमचो कमलविनायकको आयोजनामा क्षमता अभिवृद्धिसम्बन्धी ३ दिने तालिम सुरु भएको छ । जसअन्तर्गत आज Training on Managing Better Self Through Self Awareness and Interpersonal Relationship बारे तालिम दिइयो ।

उद्घाटन सत्रका प्रमुख अतिथि नेमकिपाका केन्द्रीय सदस्य एवं बागमती प्रदेशसभाका सदस्य सुरेन्द्रराज गोसाईले व्यक्तिको विचार नै व्यक्तित्वको मूल आधार भएको विचार व्यक्त गर्नुभयो । उहाँले अगाडि भन्नुभयो– ‘तालिममा सिकेका सिप भोलिका दिनमा व्यवहारमा यहाँहरूले उतार्नु हुने नै छ ।’
कोही पनि व्यक्ति सर्वज्ञाता बन्न खोज्नुजस्तो मुर्खता अरू केही नहुने चर्चा गर्दै आत्म समीक्षा गरेर अघि बढ्न सके हामीबाट कम गल्ती हुनेछ उहाँले भन्नुभयो ।
सुझबुझको अभाव नै हाम्रो आजको समाजको समस्या भएको भन्दै उहाँले अब विद्यालय वा कलेज मात्र सिक्ने थलो हुनुहुँदैन भन्नुभयो ।
व्यक्तिको मात्र नभई संस्थाको व्यक्तित्वमा पनि विशेष ध्यान दिनुपर्ने उल्लेख गर्दै उहाँले संस्थाको व्यवस्थित व्यवस्थापनले हाम्रो सांस्कृतिक उचाइ बढ्नेमा प्रकाश पार्नुभयो ।
प्रधानमन्त्रीजस्तो व्यक्तिले ‘एमालेले काठमाण्डौं कब्जा गर्ने’ अभिव्यक्ति दिनु उचित नभएको भन्दै उहाँले बागमती प्रदेशका पूर्वमुख्यमन्त्रीहरूमै ठोस राजनीतिक दृष्टिकोणको अभाव भएको दृष्टान्त दिनुभयो ।
सत्तापक्षीय सांसदहरूलाई नै प्रदेश प्रमुख को हो भन्ने जानकारी नहुनु र प्रदेश प्रमुखलाई गर्ने व्यवहारमा शिष्टाचारको अभाव देखिनु सबै संस्थाको व्यक्तित्वसित सम्बन्धित विषय हुनु उहाँले भन्नुभयो ।
विश्वविद्यालय अनुदान आयोगको सहयोगमा भएको उक्त तालिमको उद्घाटन सत्रमा कलेज व्यवस्थापन समितिका सदस्य एवं वडाध्यक्ष रवीन्द्र ज्याख्वले कलेजले शिक्षक कर्मचारीको सीप विकासको लागि निरन्तर विविध विषयमा तालिम दिइरहेको चर्चा गर्दै जीवनमा सिपको महत्वमाथि प्रकाश पार्नुभयो भने वागीश्वरी कलेज अफ म्यानेजमेन्टका प्राचार्य कृष्णप्रसाद धन्छाले शुभकामना मन्तव्य दिनुभएको थियो ।

आयोजक कलेजका प्राचार्य धनकुमार श्रेष्ठको सभापतित्वमा भएको उक्त कार्यक्रममा मानविकी सङ्कायका इन्चार्ज राजन फेलु र शिक्षक विकल प्रजापतिले पनि बोल्नुभएको थियो ।

कुल ३५ जनाको सहभागिता रहेको उक्त तालिममा उत्तम आचार्य र विनोदकुमार विष्टले तालिम दिनुभएको थियो ।

भक्तपुर, २४ चैत । वागीश्वरी कलेजमा क्वालिटेटिभ डेटा एनालाइसिस सफ्टवेयर प्रयोगसम्बन्धी तीनदिने कार्यशाला आइतबार सम्पन्न भएको छ । तालिममा सहभागी फ्याकल्टी सदस्यहरूलाई वागीश्वरी कलेज व्यवस्थापन समितिका अध्यक्ष एवं भक्तपुर नगरपालिकाका प्रमुख सुनिल प्रजापतिले प्रमाणपत्र वितरण गनुर््भयो ।

सो अवसरमा नगर प्रमुख प्रजापतिले अनुसन्धानमा अघि बढेको देश शिघ्र विकास हुने गरेको चर्चा गर्दै भक्तपुरका कलेजहरूले अध्ययन र अनुसन्धानको नमुना बनेर देखाउनुपर्नेमा जोड दिनुभयो ।
उहाँले नेपालमै पनि अनुसन्धान गर्नुपर्ने विषय कमी नभएको चर्चा गर्दै नेपालसम्बन्धीे तथ्य तथ्याङ्क र अनुसन्धान प्रतिवेदन विदेशीमा भर पर्नुपर्ने अवस्था सधैं रहनु हुँदैन भन्नुभयो ।

प्रमुख प्रजापतिले अमेरिकी सहयोग रोकिएपछि नेपालको स–साना धेरै अनुसन्धान रोकिएको समाचार बाहिरिएको चर्चा गर्दै विदेशीको भर पर्ने सरकारको प्रवृत्तिले देशको हित र विकास हुन नसकिरहेको प्रस्ट पार्नुभयो ।
कार्यक्रममा तालिमका स्रोतव्यक्ति डा. बलराम दुवालले देशमा अनुसन्धानको निम्ति वातावरण नबनेको र मौका पाएका कतिपयले पनि सदुपयोग गर्न नसकेको बताउनुभयो ।

कलेजका प्राचार्य धनकुमार श्रेष्ठले तालिमले वागीश्वरी कलेजको पठनपाठनमा टेवा पुग्नुका साथै शिक्षक–प्राध्यापकहरूले समाजका अन्य क्षेत्रमा पनि गहकिलो योगदान पु¥याउन सक्ने बताउनुभयो । कार्यक्रममा वागीश्वरी कलेज अफ म्यानेजमेन्टका प्राचार्य कृष्णप्रसाद धन्छा र वागीश्वरी माविका प्रधानाध्यापक कृष्णप्रसाद कार्माचार्यको पनि उपस्थिति रहेको थियो ।

भक्तपुर, २४ माघ । नेपाल मजदुर किसान पार्टीका अध्यक्ष नारायणमान बिजुक्छँे (रोहित) को प्रमुख आतिथ्यमा वागीश्वरी माविको ६६ औँ, वागीश्वरी कलेजको १७ औँ र वागीश्वरी कलेज अफ म्यानेजमेन्टको दोस्रो वार्षिकोत्सव कार्यक्रम बिहीबार एक भव्य कार्यक्रमबिच सम्पन्न भयो ।

कार्यक्रमको उद्घाटन गर्दै अध्यक्ष बिजुक्छेँले ख्वप विश्वविद्यालय सञ्चालन स्वीकृति दिने विषयमा सरकार अहिले पनि सकारात्मक नदेखिएको बताउँदै सक्षम स्थानीय तहलाई विश्वविद्यालय सञ्चालन गर्न दिइनुपर्ने बताउनुभयो ।

नगरपालिकाले विश्वविद्यालय सञ्चालन गर्न सक्दैन भन्ने सोच खोटपूर्ण रहेको बताउँदै उहाँले भक्तपुरका हरेक ठाउँ र यहाँका नागरिकहरू आफैमा विश्वविद्यालयका महत्वपूर्ण पूर्वाधारहरूको रूपमा रहेको उल्लेख गर्नुभयो ।

नेपालमा गणतन्त्र आए पनि गणतन्त्रविरोधीहरू अहिले पनि सक्रिय रहेको बताउँदै उहाँले सत्तामा बस्नेहरूमा दूरदर्शी सोचको अभाव रहेको बताउनुभयो ।

अध्यक्ष बिजुक्छेँले भन्नुभयो, “प्रजातन्त्रमा प्रतिपक्षको अलग भूमिका हुने बताउँदै प्रतिपक्ष बलियो भएन भने प्रजातन्त्र पनि कमजोर हुन्छ । प्रजातन्त्रको मर्म थाहा नहुनेहरू सत्तामा छन् । सिद्धान्तहीन मान्छे विश्वसनीय हुँदैन । पदमा बस्नेहरूको बौद्धिक स्तर मापन गर्नुपर्छ ।”

“भक्तपुरलाई विश्वविद्यालयको स्वीकृति नदिने सरकारको ठुलो गल्ती हो । यहाँका नागरिकहरू आफैँमा कलाकार र सांस्कृतिक गुरु हुन् ।”, उहाँले भन्नुभयो ।

कार्यक्रमका सभापति, वागीश्वरी कलेज व्यवस्थापन समितिका अध्यक्ष एवम् भक्तपुर नगरपालिकाका प्रमुख सुनिल प्रजापतिले वागीश्वरी कलेज गुणस्तर सुनिश्चितता तथा प्रत्यायनको प्रमाणपत्र (क्यु.ए.ए.) प्राप्त गर्ने भक्तपुर जिल्लाको पहिलो सामुदायिक कलेज भएको बताउँदै यससँगै वागीश्वरीमा नयाँ नयाँ विषयहरू अध्ययन अध्यापनको लागि सहजता मिलेको बताउनुभयो ।

वागीश्वरी कलेजले विदेशीको सहयोगबिना, सङ्घ र प्रदेशको भर नपरी आफ्नै बलबुत्तामा शैक्षिक विकास गरिरहेको बताउँदै उहाँले वार्षिक १ लाखको हाराहारीमा नेपाली विद्यार्थी बिदेसिँदा नेपालमा दक्ष जनशक्तिको अभाव हुने बताउनुभयो । वागीश्वरीले हरेक विद्यार्थीहरूलाई योग्य, दक्ष र अनुशासित बनाउने प्रयास गरिरहेको उहाँले बताउनुभयो ।

नेमकिपा वाग्मती प्रदेशसभा सदस्य सुरेन्द्रराज गोसाईले नयाँ पुस्तालाई भाषिक, साहित्यिक, सांस्कृतिक, प्राविधिकरूपमा दक्ष बनाउनु आजको आवश्यकता भएको बताउँदै सक्षम स्थानीय सरकारलाई जिम्मेवार र अधिकार सम्पन्न बनाउँदै शैक्षिक क्षेत्रमा विद्यालयदेखि विश्वविद्यालय सञ्चालन गर्न दिइनुपर्ने बताउनुभयो ।

उहाँले स्थानीय नगरपालिका र जनसमुदाय मिलेर ईसीडी शिक्षालाई आफ्नोपन दिएर अगाडि बढाउनुपर्नेमा जोड दिँदै विदेशी प्रभावमा पाठ्यक्रमहरू परिमार्जन गर्दै जाँदा नेपालको पाठ्यक्रम र परीक्षा प्रणालीमा ठुलो समस्या निम्तिएको बताउनुभयो ।

उहाँले संरा अमेरिकामा ट्रम्पको उदयसँगै हिटलरको पुनर्जन्म भएको बताउँदै अमेरिकाले चीनसँग मात्र व्यापार युद्ध गरिरहेकोमा हाल क्यानाडा, मेक्सिकोलगायतका देशहरूसँग पनि युद्ध गरी अमेरिकाले साम्राज्यवादी चरित्र प्रदर्शन गरिरहेको बताउनुभयो । संरा अमेरिकाको साम्राज्यवादी नीति नेपाललगायत विश्वकै लागि घातक भएको बताउँदै सांसद गोसाईले विश्व राजनीतिमा अमेरिका एक्लिँदै गइरहेको बताउनुभयो ।

भक्तपुर नगरपालिकाका उपप्रमुख रजनी जोशीले वागीश्वरीले समाजलाई सही दिशातर्फ मार्गनिर्देश गरिरहेको बताउँदै भक्तपुर नपाले शिक्षा क्षेत्रमा ख्वप विश्वविद्यालय सञ्चालन गर्ने दीर्घकालीन उद्देश्यका साथ अगाडि बढिरहेको बताउनुभयो ।

वागीश्वरी मावि व्यवस्थापन समितिका अध्यक्ष रवीन्द्र ज्याख्वले एउटै छानामुनि तीनवटा शैक्षिक संस्था सञ्चालन गरी वागीश्वरी सामूहिक नेतृत्वमा विश्वास राख्ने संस्था भएको बताउनुभयो । भक्तपुर नपाबाट सञ्चालित सातवटा शैक्षिक संस्थाहरूले सस्तोमा गुणस्तरीय शिक्षा प्रदान गरिरहेको बताउँदै उहाँले भक्तपुर शैक्षिक गन्तव्यस्थलको रूपमा विकास भइरहेको बताउनुभयो ।

उहाँले कामदारवर्गका छोराछोरीलाई गुणस्तरीय शिक्षा दिने उद्देश्यले वागीश्वरी मावि र कलेजको स्थापना भएको बताउँदै सामुदायिक विद्यालयप्रति सरकारको दृष्टिकोण खोटपूर्ण रहेको बताउनुभयो ।

नेपाल क्रान्तिकारी शिक्षक सङ्घका केन्द्रीय कोषाध्यक्ष चक्रबहादुर चाकतुले विद्यार्थी सङ्ख्या, विषयवस्तुको आधारमा शिक्षक दरबन्दी कायम गर्नुपर्ने बताउनुभयो ।

सरकारले विद्यालयहरूमा पर्याप्त शिक्षक र कर्मचारीहरूको व्यवस्था गर्नुपर्ने तथा एसईईलाई निरन्तरता दिइनुपर्ने उहाँले बताउनुभयो ।

कार्यक्रममा राष्ट्रिय परीक्षा बोर्डका अध्यक्ष डा. महाश्रम शर्माले नेपालको शैक्षिक क्षेत्रलाई अगाडि बढाउन वागीश्वरीको महत्वपूर्ण भूमिका रहेको बताउँदै वागीश्वरीबाट उत्पादित विद्यार्थीले समाज, देश र विश्वलाई गरेको योगदानले यहाँको शैक्षिक गुणस्तरको मापन भइरहेको बताउनुभयो ।

कार्यक्रममा वागीश्वरी माविका प्रअ कृष्णप्रसाद कर्माचार्य, वागीश्वरी कलेज अफ म्यानेजमेन्टका प्राचार्य कृष्णप्रसाद धन्छा र वागीश्वरी कलेजका प्राचार्य धनकुमार श्रेष्ठले वार्षिक प्रगति प्रतिवेदन प्रस्तुत गर्नुभयो ।

कार्यक्रममा वार्षिकोत्सवका संयोजक ज्ञानेन्द्र श्रेष्ठले स्वागत मन्तव्य राख्नुभएको थियो भने वागीश्वरी पूर्वविद्यार्थी समाजका रत्नप्रसाद प्रजापति, विद्यार्थी प्रतिनिधिहरू मनोज कुटुवा, सगुन धन्छा, काजल थापाले शुभकामना मन्तव्य राख्नुभएको थियो ।

कार्यक्रममा प्रमुख अतिथि बिजुक्छेँले वागीश्वरी स्मारिका विमोचन गर्नुभएको थियो भने प्रमुख अतिथि तथा अतिथिहरूले शिक्षक र विद्यार्थीहरूलाई पुरस्कार वितरण, सम्मान तथा छात्रवृत्ति हस्तान्तरण गर्नुभएको थियो ।

कार्यक्रमको औपचारिक सत्र समाप्त भएपछि विद्यार्थीहरूले सांस्कृतिक कार्यक्रम प्रस्तुत गरेका थिए ।

भक्तपुर, २६ जेठ । वागीश्वरी कलेज तुमचो व्यवस्थापन समितिको आयोजनामा सरकारद्वारा प्रस्तुत आ.व.२०८१/०८२ को बजेटबारे अन्तरक्रिया कार्यक्रम गरियो । वाग्मती प्रदेशसभा सदस्य सृजना सैँजुको आतिथ्यमा भएको उक्त कार्यक्रममा उहाँले संविधानमा देश समाजवादउन्मुख भनिए पनि व्यवहार देश विदेशउन्मुख भएको बताउनुभयो ।
देशको युवा जनशक्ति विदेश पठाएर रेमिटेन्सको भरमा देश चलाउन खोज्नु सरकारको गलत नीतिको आलोचना गर्दै उहाँले देशका व्यापारघाटा धान्नै नसक्ने अवस्थामा पुगेको चर्चा गर्नुभयो ।
देश विदेशी वैशाखीमा अडेको बताउँदै उहाँले ७८ प्रतिशत बजेट केन्द्रमा केन्द्रित गरेको उदाहरणका साथ स्थानीय तहलाई सबल बनाउनुपर्नेमा जोड दिनुभयो ।
कुनै पनि देश आर्थिकरूपमा आत्मनिर्भर नभइकन राजनीतिकरूपमा मात्र स्वाधीन नहुने भन्दै उहाँले देशको अर्थतन्त्र भारतीय एकाधिकार पुँजीको कब्जामा गएकोमा आक्रोश व्यक्त गर्नुभयो ।
उहाँले भन्नुभयो, “देशका प्रायः सबै उद्योगहरू भारतीय एकाधिकार पुँजीले कब्जामा लिइसकेको छ ।” “नेपालको जलविद्युत् भारतलाई सस्तोमा बेची भारतबाट महँगोमा पेट्रोलियम पदार्थ किन्ने हाम्रो देशको अर्थतन्त्र कसको हितमा छ ?” उहाँले प्रश्न गर्नुभयो ।
भारतीय एकाधिकार पुँजीको विषय पाठ्यपुस्तकमा नभए पनि विद्यार्थीहरूले जान्नैपर्ने सुझाव दिँदै उहाँले संसार पुँजीवादी र समाजवादी अर्थतन्त्रमा विभाजित भइरहेको अवस्थामा नेपालले अवलम्बन गरेको मिश्रित अर्थतन्त्र पनि वास्तवमा पुँजीवादी अर्थतन्त्र नै भएको दाबी गर्नुभयो ।
कार्यक्रममा वागीश्वरी कलेज अफ म्यानेजमेन्टका प्राचार्य कृष्णप्रसाद धन्छाले शासक दलका मन्त्रीहरूले आफ्नो निर्वाचन क्षेत्र र जिल्लालाई बढी बजेट पारेको र कानुनअनुसार दिर्नैपर्ने बजेट पनि भक्तपुर नगरपालिकालाई बजेट नदिई विभेद गरेकोमा सरकारको आलोचना गर्नुभयो ।
कलेजका संयोजक ज्ञानसागर प्रजापतिले बजेटमा विनापूर्वाधारका अन्य विश्वविद्यालयको बारेमा चर्चा भए पनि ख्वप विश्वविद्यालयको बारे कुनै चर्चासम्म नगरेको हुँदा सरकार सस्तोमा स्तरीय शिक्षाको पक्षमा नरहेको प्रस्ट हुन्छ भन्नुभयो ।
अर्थशास्त्र विषयका शिक्षक मुरज दिदियाले बजेट सरसरती हेर्दा देश विकासतिर लम्किरहेको जस्तो देखिए पनि यथार्थमा देश ऋण लिएर सावाँ भुक्तानी गर्नुपर्ने अवस्थामा पुगेको बताउनुभयो ।
कलेजका प्राचार्य धनकुमार श्रेष्ठको सभापतित्वमा भएको उक्त कार्यक्रममा शिक्षक एवं अर्थ पत्रकार पूर्णभक्त दुवाललसहित बीबीएस द्वितीय वर्षका विद्यार्थीहरू सुवास दुलाल, किङसाङ योञ्जन, राजकुमार बस्नेत र राजाराम तामाङले बजेटका विविध पक्षबारे छुट्टाछुट्टै प्रस्तुति दिनुभएको थियो ।

भक्तपुर । भक्तपुर नगरपालिकाका प्रमुख एवं वागीश्वरी कलेज अफ म्यानेजमेन्ट व्यवस्थापन समितिका अध्यक्ष सुनिल प्रजापतिले युग सुहाउँदो जनशक्ति उत्पादन गर्ने, आफ्नै बलबुट्टामा उभिने प्रयास गर्ने र सम्पूर्ण विद्यार्थीहरुमा देशभक्ति भावना जगाउनुपर्नेमा जोड दिनुभएको छ । वागीश्वरी कलेज अफ म्यानेजमेन्टमा बीबीए प्रथम वर्षमा भर्ना भएका विद्यार्थीहरुको लागि आयोजित अभिमुखीकरण कार्यक्रममा उहाँले उक्त विचार व्यक्त गर्नुभएको हो ।
देशमा साँचो परिवर्तन चाहने हो भने शिक्षालाई पहिलो प्राथमिकता दिनुपर्छ भन्दै उहाँले भक्तपुर नगरपालिकाले प्रसूतिगृहदेखि शिशु स्याहार केन्द्र, कलेजहरुसमेत सञ्चालन गरिरहेको जानकारी दिनुभयो । शिक्षामा गरिएको लगानी आजको भोलि नै प्रतिफलको नआउने चर्चा गर्दै उहाँले विगतमा वागीश्वरी कलेजले १५ वर्षभित्र २ पटक नेपाल टप नतिजा ल्याएर देखायो भने अब नेपाल टप नतिजा ल्याउने पालो वागीश्वरी कलेज अफ म्यानेजमेन्टको हो, यसको लागि शिक्षक, विद्यार्थी, अभिभावक र कलेज व्यवस्थापन समितिको संयुक्त प्रयास आवश्यक छ भन्नुभयो ।

शिक्षालाई महत्व दिएकै कारण छिमेकी मुलुक चीनले प्रगति गरिरहेको चर्चा गर्दै भन्नुभयो– ‘शिक्षाकै कारण चीन अगाडि बढिरहेको हो । कुनै बेला श्रीलङ्का पनि चर्चाको शिखरमा थियो तर भ्रष्टाचारको कारण श्रीलङ्का दुरावस्थाबाट गुज्रिरहेको छ । हाम्रो देश पनि अहिले भ्रष्टाचारकै कारण दुरावस्थाबाट गुज्रिरहेको छ । यसलाई सुधार्न हामी नै लाग्नुपर्छ ।’
बल्लतल्ल पास गर्ने सोच नराखी सर्वोत्कृष्ट नतिजा ल्याउने आँट गरौँ, परनिर्भरको सोच त्यागौं, दुःख भए पनि आत्मनिर्भर हुने, देशलाई सक्षम बनाउने प्रयास गरौं भन्दै उहाँले यो देशका उच्च पदाधिकारी पढेलेखेका व्यक्तिहरुले देशको माना खाएर विदेशीको गाना गाइरहेकोमा आपत्ति जनाउनुभयो । उहाँले भन्नुभयो– ‘एकातिर देशको उच्च ओहोडामा बसेका छन् भने अर्कोतिर विभिन्न एनजीओ, आइएनजीओबाट मोटो रकम खाएर देशलाई दुत्कार्दै विदेशको प्रशंसा गरिरहेका छन्† जुन आपत्तिजनक छ । हामीले नयाँ पुस्तालाई निराशा हैन आशा जगाउनुपर्छ । आर्थिक दरिद्रताभन्दा बौद्धिक दरिद्रता धेरै खतराजनक छ । परिश्रम गरौं, देश बदलौं, सङ्घर्ष गरौं, भविष्य नयाँ पुस्ताकै हो ।’
कार्यक्रममा वागीश्वरी कलेजका प्राचार्य धनकुमार श्रेष्ठले वागीश्वरी कलेज र वागीश्वरी कलेजफ म्यानेजमेन्ट छुट्टाछुट्टै शैक्षिक संस्था भए पनि एकापसमा हातेमालो गरेर अगाडि बढिरहेको चर्चा गर्दै विद्यार्थीलाई पाठ्यपुस्तकमात्र सीमित नराखी अतिरिक्त सिप पनि दिंदै आएको प्रस्ट्याउनुभयो ।
वागीश्वरी कलेज अफ म्यानेजमेन्टका प्राचार्य कृष्णप्रसाद धन्छाको सभापतित्वमा भएको उक्त कार्यक्रममा कलेजका संयोजक ज्ञानसागर प्रजापतिले स्वागत गर्दै कलेजमा शिक्षकले अभिभावकको पनि भूमिका खेल्ने र घरमा अभिभावकले शिक्षकको पनि भूमिका खेले विद्यार्थीहरु गलत बाटोमा नबरालिने विचार राख्नुभयो । कार्यक्रम बीबीए दोस्रो सेमेष्टरमा अध्ययनरत विद्यार्थी मनोज कुटुवाले आफ्नो अनुभव सुनाउनुभएको थियो ।

भक्तपुर– वागीश्वरी कलेजमा स्नातक तह तेस्रो वर्षमा अध्ययनरत विद्यार्र्थीहरूले भक्तपुर नगरपालिकाका प्रमुख एवं वागीश्वरी कलेज व्यवस्थापन समितिका अध्यक्ष सुनिल प्रजापतिसँग ‘गुठी एक सामाजिक संस्था’ विषयमा अन्तरक्रिया कार्यक्रम मङ्गलबार सम्पन्न भयो ।

कार्यक्रममा प्रमुख अतिथि सुनिल प्रजापतिले बेलायतको संविधानजस्तै गुठीमा पनि अलिखित नियम, कानुन रहेको र यस नियम कानुनलाई सबै गुठीयारहरूको सहमतिमा मात्र सुधार तथा परिमार्जन गर्न सकिने बताउनुभयो ।
सामाजिक संस्थाको रुपमा स्थापित गुठीले समाजका व्यक्तिहरूद्वारा सामाजिक उद्देश्य पूर्ति गर्ने र संस्कृति, संस्कारहरूलाई निरन्तरता दिने उहाँले बताउनुभयो ।

गुठीमा अपनाइने कार्यहरूका बारेमा विद्यार्र्थीहरूलाई सहज तथा सरल तरीकाले बताउँदै उहाँले गुठी समुदाय अरू संस्थाभन्दा भिन्नै तरिकाले चल्ने गर्दछ भन्नुभयो । उहाँले भन्नुभयो, ‘गुठी सरकारी, निजि र राज गुठी गरी तीन प्रकारका हुन्छन् ।’
समुदाय र गुठियारबिच मर्दापर्दा सहयोग गर्ने, समाजको हित र भलाइको निम्ति काम गर्ने, परम्परादेखि चल्दै आएको चलन, रहनसहन, नैतिक अनुशासन, परिवेशलाई वर्तमान समयमा पनि निरन्तता दिई आउदो पिँढीलाई हस्तान्तरण गर्दै जानुका साथै सांस्कृतिक सम्पदाहरूको जोहो गर्ने जिम्मेवारवोध गुठीले गर्ने बताउँदै गुठी कुनै पनि व्यक्तिगत फाइदाका निम्ति नचल्ने उहाँले बताउनुभयो ।

कार्यक्रममा विद्यार्र्थीहरू काजल थापा, रूपा धिमाल, गौरव लामिछाने, बिना वनमाला र प्रनिता अधिकारीले आफ्नो समुहबाट अवलोकन गरिएका सामुदायिक संस्थाहरू जस्तै सामुदायिक वन, सहकारी, धार्मिक स्थल, विद्यालय, अस्पतालहरूको बारेमा छोटो प्रस्तुति दिएका थिए ।
विद्यार्थी सरला लवजूको सभापतित्वमा भएको कार्यक्रममा विद्यार्थीहरू ज्योतिका शिल्पकार र मालती पराजुलीले पनि बोल्नुभएको थियो ।

• 

• 

• 

• 

• 

भक्तपुर, ४ मंसिर । वागीश्वरी माध्यमिक विद्यालय/कलेज सञ्चिति कोषको पाँचौ वार्षिक साधारण सभा शनिबार सम्पन्न भएको छ ।
कार्यक्रमका प्रमुख अतिथि भक्तपुर नगरपालिकाका प्रमुख एवं वागीश्वरी कलेज व्यवस्थापन समितिका अध्यक्ष सुनिल प्रजापतिले जीवनभर कमाएको इज्जत मान, प्रतिष्ठा सानो कमजोरीले केही समयमै समाप्त हुनसक्ने कुरामा सचेत पार्दै सम्पूर्ण भक्तपुरवासीहरुको संयुक्त प्रयासले नै आज भक्तपुर नपा अरुको निम्ति नमुना हुन सफल भएको प्रस्ट पार्नुभयो ।
भक्तपुरबाट एसईई परीक्षा उत्तीर्ण विद्यार्थीहरुको सङ्ख्या र कक्षा ११ मा भर्ना भएका विद्यार्थीहरुको सङ्ख्या तुलना गर्दा भक्तपुरबाट उत्तीर्ण भएका विद्यार्थीहरुले उच्च शिक्षा अध्ययन गर्न भक्तपुरकै शैक्षिक संस्थाहरुलाई चयन गरेको आँकलन गर्दै भक्तपुरलाई शैक्षिक गन्तव्यको रुपमा स्थापित गर्ने भक्तपुरवासीको इच्छा विस्तारै पूरा हुँदै गएको उहाँले बताउनुभयो ।
न्यून आय भएका सम्पूर्ण भक्तपुरवासीका छोराछोरीहरुलाई उच्च शिक्षाबाट बञ्चित हुन नदिन भक्तपुर नपालगायत अरु शैक्षिक संस्थाहरुले वार्षिक करोडौं रुपैया छात्रवृत्ति प्रदान गर्दै आएको उहाँले जानकारी दिनुभयो ।
विद्यालय व्यवस्थापन समितिका अध्यक्ष एवं भक्तपुर नपा ९ नं. वडाका अध्यक्ष रवीन्द्र ज्याख्वले वागीश्वरीले व्यवस्था गरेको सञ्चिति कोषले वागीश्वरीलाई थप प्रगतिउन्मुख बनाउन उत्प्रेरकको भूमिका निर्वाह गर्नेमा विश्वास व्यक्त गर्नुभयो ।
वागीश्वरी सामुदायिक संस्था भएकोले समुदायसँगको अन्तरक्रिया अत्यावश्यक भएकोतर्फ इङ्गित गर्दै विद्यार्थीहरुलाई स्थानीय संस्कृति, रहनसहनबारे जानकारी दिन शिक्षकहरुले चिन्तन गर्नुपर्ने आवश्यकता औंल्याउनुभयो ।
विद्यालयका प्रधानाध्यापक कृष्णप्रसाद धन्छाले विद्यार्थीहरुको विकास शैक्षिक गतिविधिहरुबाट मात्र पूर्ण नहुने भएकोले विद्यार्थीहरुको सर्वाङ्गीण विकासको लागि शिक्षकहरुले अतिरिक्त क्रियाकलापलाई पनि ध्यान दिनुपर्ने आवश्यकता औंल्याउनुभयो ।
वागीश्वरी मावि तथा कलेजका संयोजक ज्ञानसागर प्रजापतिले जग नै भवनको प्राण हुने भएकोले विद्यालयको जग प्रावि तहमा विद्यार्थीहरुको सङ्ख्याको साथै गुणस्तर बढाउनतिर ध्यान केन्द्रित हुनुपर्ने बताउनुभयो ।
शिक्षण पेशा पैसाको प्यास मेटाउने पेशा नभइकन सम्मान, गौरवको पेशा भएकोले विद्यार्थी धेरै भएकोमा झर्को नमानी व्यवस्थित सेवा पु¥याउनतिर ध्यान जान आवश्यक छ भन्नुभयो ।
कोषका अध्यक्ष एवं वागीश्वरी कलेजका प्राचार्य धनकुमार श्रेष्ठले प्रस्तुत गर्नुभएको प्रतिवेदन रायसुझावसहित पारित गरिएको उक्त कार्यक्रममा विद्यालयका सहायक प्रधानाध्यापकद्वय कृष्णप्रसाद कर्माचार्य, उकेश सुवाल तथा शिक्षिका कविता प्रजापति, शर्मिला प्रजापतिले पनि बोल्नुभएको थियो ।